Sala de prensa

A investigación iniciouse a finais do mes de xullo grazas a unha información da Policía Nacional de Colombia e dos axentes españois, na que se sospeitaba do envío a España de dúas grandes partidas de pastillas de droga sintética procedentes do seu país. Coa colaboración de EUROPOL e da Drug Enforcemente Administration (DEA) estadounidense púxose en marcha un operativo para evitar esa nova ruta de droga en Europa.

Maletas “dobradas” para transportar a droga

As indagacións dos axentes permitiron detectar a presenza en Colombia dunha organización criminal que se atopaba tratando de abrir unha nova vía de introdución de drogas sintéticas no noso país. Para o traslado do estupefaciente a organización utilizaba avións comerciais, con orixe en Bogotá e destino a Madrid, nos que os investigados, servíndose de persoal aeroportuario ao servizo da rede criminal e mediante o uso de maletas “dobradas” (maletas con etiqueta de facturación falsificadas), ocultaban as pastillas e enviábanas ao noso país.

No transcurso da investigación, que continúa aberta, interveuse no aeroporto Adolfo Suárez Madrid-Barallas, dúas bolsas de deporte que no seu interior contiñan 59 bolsas de plástico con 120.000 pastillas de cor azul e un peso de máis de 34 quilogramos. Noutro voo, no mesmo aeroporto,  interviñéronse  outras dúas bolsas de deporte que contiñan 62 bolsas de plástico nas que atoparon 130.000 pastillas do mesmo tipo que arroxaron un peso de máis de 35 quilos.

Durante as análises efectuadas sobre as pastillas intervidas, os especialistas da Comisaría Xeral de Policía Científica detectaron no primeiro envío trazas significativas de ketamina e no segundo, a mesma sustancia estupefaciente con rastros de fentanilo.