Operación conxunta da Policía Nacional e a Axencia Tributaria

Intervidos 150 quilos de cocaína na estrutura mergullada do casco dun mercante portacontedores

A droga pretendía ser introducida en España a través do Porto de Vigo e atopábase encostada ao casco do buque por baixo da liña de flotación polo que tiveron que intervir mergulladores do Grupo Especial de Operacións, xunto con axentes da Base Marítima de Vixilancia Aduaneira en Vigo, para a súa incautación

A operación levouse a cabo coa colaboración da axencia norteamericana DEA (Drug Enforcement Administration) que alertou da posible entrada en España da droga

22/04/25

Axentes da Policía Nacional, nunha operación conxunta con Vixilancia Aduaneira da Axencia Tributaria, interviñeron en Vigo 150 quilos de cocaína que se atopaba na estrutura mergullada do casco dun mercante portacontedores. A droga pretendía ser introducida en España a través do Porto de Vigo e para a súa incautación tiveron que intervir mergulladores do Grupo Especial de Operacións, xunto con axentes da Base Marítima de Vixilancia Aduaneira en Vigo, ao estar encostada ao casco do buque por baixo da liña de flotación. A operación levouse a cabo coa colaboración da axencia norteamericana DEA (Drug Enforcement Administration) que alertou da posible entrada da droga en España.

A investigación iniciouse a principios de abril cando, a través da axencia americana DEA, recibiuse información de que unha organización criminal de carácter internacional pretendía introducir en España unha importante cantidade de cocaína a través do Porto de Vigo.

As indagacións permitiron pescudar que, para o transporte da droga ao noso país, pretendíase utilizar un buque portacontedores que atracaría na cidade viguesa. Ademais, os axentes detectaron que o método de ocultación podería ser mediante “adosamiento” na parte mergullada do casco do portacontedores.

Unha vez amarrado a porto o barco no que se sospeitaba que viña escondida a cocaína, en coordinación co Servizo de Vixilancia Aduaneira de Vigo, realizouse unha inspección da parte mergullada do buque. Durante a inspección participaron mergulladores do Grupo Especial de Operacións e axentes da Unidade Operativa e Base Marítima de Vixilancia Aduaneira en Vigo, que localizaron nun dos compartimentos do casco cinco bolsas que ocultaban 150 quilogramos de cocaína.

A investigación continúa aberta para o esclarecemento dos feitos e localizar aos integrantes da organización criminal implicados no envío.

Últimas novidades