Será o primeiro corpo policial español en contar cunha moeda de curso legal

España porá en circulación unha moeda de 2 euros conmemorativa do 200 aniversario da Policía Nacional

Emitirase durante o primeiro trimestre do ano que vén, e nela aparecerá o emblema do Corpo e unha lenda circular situada na parte superior na que poderá lerse “POLICÍA NACIONAL 1824-2024"

Estas moedas conmemoran aniversarios de feitos históricos ou pon de relevo acontecementos actuais con transcendencia histórica

30/11/23

O 200 aniversario da creación da Policía Nacional celebrarase, entre outras iniciativas, coa emisión, acuñación e posta en circulación dunha moeda de 2 euros conmemorativa, que verá a luz durante o primeiro trimestre do ano 2024. Así o confirma o Boletín Oficial do Estado deste martes, onde se regula que na cara nacional das moedas emitidas (anverso) aparecerá o emblema da Policía Nacional. Sobre este emblema, en sentido circular e en maiúsculas, poderá lerse a lenda POLICÍA NACIONAL 1824-2024, mentres que na parte inferior, tamén en sentido circular e en maiúsculas, aparecerá a lenda ESPAÑA. Rodeando todos estes motivos, na zona circular exterior da moeda situaranse as doce estrelas da Unión Europea.

As moedas conmemorativas terán curso legal en todos os países da zona do euro, polo que poderán utilizarse e deberán ser aceptadas como calquera outra moeda en curso.

Moedas emitidas por España

As moedas conmemorativas posúen as mesmas características, propiedades e cara común que as demais moedas de 2 euros. O que a diferenza é o motivo que figura na cara nacional. A maioría destas moedas conmemoran aniversarios de feitos históricos ou pon de relevo acontecementos actuais con transcendencia histórica.

A primeira moeda de dous euros conmemorativa emitida exclusivamente por España dedicouse ao IV centenario da primeira edición de «O enxeñoso fidalgo don Quixote da Mancha». A segunda non saíu ata 2010, cinco anos despois.

Desde entón, todos os anos sen excepción dedicouse unha moeda conmemorativa de España a un lugar do territorio nacional declarado Patrimonio da Humanidade pola UNESCO, e a previsión é que siga sendo así durante os próximos anos. Nos anos 2014, 2018, 2022 e 2023 emitiuse, ademais, unha segunda moeda conmemorativa que reflectía o cambio na xefatura do Estado (2014), o 50 aniversario do nacemento do Rei Felipe VIN (2018), o V Centenario da Volta ao Mundo (2022), na que aparece a imaxe de Juan Sebastián Elcano, e a Presidencia española do Consello da Unión Europea (2023).

A todos estes eventos de relevancia histórica sumarase en 2024 o segundo centenario da creación da Policía Nacional. Foi o rei Fernando VII quen ditou en 1824 a Real Cédula pola que se creaba a Policía Xeral do Reino ante a necesidade de dotar ás cidades españolas dunha estrutura de seguridade moderna.

Últimas novidades